正值雙十年華的馬芷玲，人生本來充滿希望，可惜因為一宗交通意外，令她慘死輪下。可憐馬家家境清貧，芷玲一直為家庭經濟支柱，她突遭不測，不但令家人失去依靠，更要為一筆殮葬費操心，蘋果日報慈善基金即時於「殮葬專戶」撥款二萬元助家屬應急。

芷玲猝然離世，馬家上下瀰漫着一片愁雲慘霧，雙親痛心之餘，還要強作鎮定，刻意將女兒的死訊隱瞞，免得芷玲年老的嫲嫲抵受不住刺激。「我自己聽到呢個消息之後，都差不多頂唔順幾乎暈低，更何況一個八十幾歲嘅老人家，佢好錫呢個孫女，我真係唔敢同佢講，佢早兩日打電話嚟搵芷玲，我都係搵另一個女扮住聲先咋，𠵱家都唔知點算，見步行步啦。」五十二歲的馬父悲慼地說。

「屋企搵朝唔得晚」
二十三歲的芷玲，在家人心目中絕對是一名孝順女，可惜天妒紅顏，無端飛來橫禍，奪去這名乖乖女的寶貴性命。上月二十五日，芷玲與舊同學聚會後，乘坐由友人駕駛的電單車，準備由西貢清水灣返回觀塘順利邨的寓所，途中疑與一輛私家車發生猛烈碰撞，芷玲整個人慘被拋出電單車外，頭盔亦撞至飛脫，身體多處受重傷，送院搶救後證實不治。
白頭人送黑頭人，馬氏夫婦肝腸寸斷，還要四出為殮葬費奔波。「老實講，屋企環境一直都唔好，失禮啲講句，真係搵朝唔得晚，𠵱家重要突然間出件咁嘅事，都唔知去邊處搵錢。」一直從事汽車維修的馬父稱，當年芷玲中五畢業後，原欲繼續升學，可惜家境欠佳，身為長女的她惟有投身社會工作，將讀書機會讓給兩名妹妹，芷玲生前則任職時裝店售貨員，每月收入約七千元。