平時唔覺唔覺，但大人望住小朋友一日一日長大，會驚覺，原來時間過得飛快。

張繼聰同老婆謝安琪(Kay)囡囡張靖(Karina)，話咁快已經半歲大，噚晚廿四孝爸爸，喺IG貼咗一家人為囡囡慶祝嘅生日飯相。仲記得Karina出院時，一家四口清一色着全黑型仔look衫(新聞連結： http://bit.ly/2nmQ4SA )。到噚晚嘅生日飯，Dress Code繼續走Cool爆嘅白襯黑。而喺短片中，哥哥張瞻仲好溫柔餵妹妹食麵包，逗妹妹開心，而鏡頭後、望住兩兄妹溫馨互動嘅Kay，亦忍唔住大笑。

噚晚生日飯，除咗張繼聰同Kay加一對仔女外，張繼聰爸爸亦有喺現場，仲同一對孫仔女合照。望真啲，張瞻同張靖同爸爸似之餘，其實同爺爺都有幾分似，難怪網民話阿聰一脈嘅基因完勝老婆。

對仔女個樣冇得變，好彩阿聰亦不忘留言冧老婆話：「Karina 半歲大啦， 感謝o依位小朋友嘅來臨，要繼續快高長大唷，更加感謝太太， 我喺tvB最多0628(朝早6點開工凌晨4點收工)，你o依個B就係全天候24小時年中無休，辛苦你了。」呢個「你」，唔使講，梗係老婆大人啦！

想隨時獲得更多親子資訊，快啲like Easy PaMa Facebook啦！
https://goo.gl/1qWM8g