久違了的利嘉兒，丰采依然。早前佢出席一個公開活動時，忽然自爆多年前曾遭無綫某高層迫佢去飯局(新聞連結: http://bit.ly/1AVsgbd )當時更因為佢拒絕出席，故遭雪藏，由《笑談普通話》人氣主持變訪問路人甲乙的二打六，利嘉兒更為此患上情緒病。復加上同DJ周國豐感情觸礁，更是雙重打擊。

事隔多年，傷口亦早已平復。利嘉兒表示於2010年再婚，但有段時間個人好腫，但有時又好瘦，仲試過爛面，點知係內分泌失調，個人仲有少少抑鬱，間唔中仲會發噩夢。至於利嘉兒嘅另一半身份，佢一直唔肯透露，但今日就有周刊爆料指，利嘉兒丈夫姓劉，係有米門鎖大王，屬隱形富豪，同家人喺內地開廠做製衣同門鎖生意，兼且有三層北角半山樓揸手。

利嘉兒同佢老公原來已經識咗好多年，直頭係利嘉兒入行前已識，當時同劉生嘅雙親已經相熟，關係唔錯。當年利嘉兒主持嗁普通話節目，兩老更是忠實fans。至於佢同劉生嘅關係呢，報道就話劉生一早對利嘉兒有好感，但就一直等到佢同周國豐分開後先至敢追求，兩人於2010年結婚，住北角半山劉家物業。不過至今利嘉兒名下暫未有物業，而且佢都非常乖巧，知道夫家愛低調，所以婚後四年幾以來都從未向傳媒披露夫家嘅嘢。

不過呢，利嘉兒今年已屆39歲，要造人生B就真係要快手，所以佢都好坦白謂想試下人工受孕，為劉家繼後香燈。