樂壇巨星梅艷芳最後一批遺物今日拍賣完畢，包括最有紀念價值嘅第一屆新秀金獎同一啲內衣，梅姐生前好友曾志偉、苗僑偉、黃秋生、徒弟譚耀文等都好嬲，紛紛諗辦法想攞番梅姐遺物，維護佢最後嘅尊嚴。

梅姐另一徒弟何韻詩，今日喺觀塘綵排演唱會，佢竟然話冇乜留意梅姐遺物被拍賣，點解？再問阿詩會唔會覺得唔尊重梅姐？佢答：「好難答，我覺得獎項係身外物，乜嘢原因要拍賣？咁多年要打咁多官司，我諗係有呢啲因素喺入面，基金運作我唔識評論，純粹覺得大家唔使擺太多思念喺獎項上，好耐之前都試過咁樣，當時我都係咁樣講，我覺得大家記住佢，嗰啲運作係冇得去評論。」問梅姐當年有冇送嘢畀佢？阿詩表示：「精神，我覺得呢啲係身外物，佢（梅姐）唔會咁在意嗰個獎項囉。」

去年雨傘運動後，今年3月阿詩喺本報專欄《詩與胡說》宣佈，正式由主流歌手成為獨立歌手。獨立歌手即係樣樣都自己負責，本月25至27日，阿詩將會喺旺角麥花臣舉行4場「HOCCReimagineLive」，佢話：「我哋隊band加咗好多樂器，比較民族風，回歸田園，我覺得喺香港，生活係會令人癲，要搵方法唔好令自己癲。」提到27日加開日場，阿詩表示想多啲人可以睇到呢個騷。問佢仲有冇向紅館入紙申請？佢話：「繼續努力，前後入咗5次，不過應該就快有消息，因為上個月入咗紙。」至於成數有幾高，阿詩覺得好難估計。