股場放大鏡:撈啤酒股宜先等等 - 歐陽風

蘋果日報 2008/01/20 00:00


上星期港股勁跌,其中一類跌幅特別大嘅係食品股及飲品股,因為中央為壓抑通脹,要出動到行政干預措施,發改委推出臨時價格管制,乳品生產商蒙牛(2319)連跌多日,至上周五才由近20元低位反彈,康師傅(322)近兩三個月曾展現出強勁抗跌力,上星期亦頂唔住,由13元樓上,幾個交易日碌落10元水平。
提防燕京復牌急挫
本月初曾熱炒嘅啤酒股如青島啤酒(168)、金威啤酒(124),近期亦受影響,連日捱沽,早前之升幅幾乎無晒。發改委上周之臨時價格管制,照計只係管必需糧食,啤酒非必然飲品,所受影響應該較細,𠵱家啤酒股跌咗咁多,係咪可以撈底?
內地啤酒品牌如燕京、金星、青島已於本月初至中旬陸續調高價格,金威、雪花、珠江陸續跟隨,漲幅平均約每箱2元人民幣,跟住仲有無得加,要睇內地報章嘅報道。
除咗加價問題,由北控(392)持有,深圳A股掛牌嘅燕京啤酒,上周四急挫逾6%後,周五停牌,公告謂有待發佈重大事項。據內地報章指,燕京啤酒回應查詢時表示,這次停牌是由於公司需要再融資,而停牌時間預計在一周左右。所謂再融資,可以配股加入投資者,亦可以係供股,而兩者差別可以好大。燕京股價由去年11月約15元炒上最近25元高位,若果復牌消息係負面的話,可以跌得好勁,亦因此想撈啤酒股都宜等多一星期至好諗。
empty
博創科藝高人膽大
創科實業(669)上周五突急升12%,呢隻股份過去兩年跌咗50%以上,自06年初股價急挫以來,幾乎未出現過明顯嘅反彈,因為創科主要市場喺美國,而且其產品包括電鑽及地板護理產品,都極受美國房地產市道影響,創科股價自06年後股價一沉不起,正正同美國樓市表現一樣。創科股價突然轉強,係咪有所啓示?睇過近期美國嘅房屋數據,仍敢博創科嘅人,只能用藝高人膽大嚟形容。