楊洛婷日前在養和順產六磅半女兒Tanya Faith Wong，老公黃天翱（Tim）今日到醫院接太太和女兒出院，BB已吃奶睡著了。二人接受訪問，楊洛婷貪靚得穿著3吋高踭鞋。

Tim話因為提早完成電影拍攝，加上演唱會改期，所以能親眼看女兒出世，楊洛婷就爆老公在產房拍片時緊張：「當我push緊，BB個頭出緊嚟，我就叫老公拍片，佢仲問我得唔得。我知呢刻唔可以miss，hold住唔push，我好清醒，之前已計劃拍攝過程。BB出世我大叫，開心到好似開party。」

榮升父母，二人表現興奮，互相指女兒似對方，Tim指要習慣湊小孩，但暫時未諗到要點樣獎勵太太，他們計劃聖誕節到美國及加拿大探親。楊洛婷指母親已立即訂機票回港見孫女：「老爺噚日就見咗孫女，佢望完之後再決定改中文名。」

楊洛婷指英文名Tanya是兩夫婦英文名結合，而Faith則寄望女兒做事有信念，佢話依家餵人奶，女兒成日嘴嘟嘟：「佢好得意，嘴唇厚，食奶時都用力啜。老公聽到阿女喊聲話好嗲，仲成日喺手機聽番喊聲。」

問到太太會否急修身，楊洛婷話：「都想快啲修身，但最重要BB健康。」他們笑言可以下個月開始追仔，Tim得戚說：「我幾時都準備好。」