正所謂「人怕出名豬怕肥」，尤其係當你有名又有利嗰時，都真係會帶嚟唔少煩惱㗎！
好似被本地網民譽為「少年股神」嘅火燎森咁，年紀輕輕已經擁有千萬資產，寫Blog寫到喺互聯網世界打出名堂，仲得到書商賞識，進軍文化界，結果反而成為網民「眾矢之的」。

費事日後唔覆當默認

華華早幾日上香港討論區，見到一個主題寫住「傳火XX破產」，根據上文下理推斷，好容易令人聯想起網民講緊嘅就係火燎森喇！
不過，成篇主題都冇講消息來源。既然冇人有真憑實據，不如就直接問當事人，睇吓到底係真有其事，定係大整蠱啦。
火燎森同華華講，話華華絕對有能力分辨到網上言論嘅真確性，不過，佢就講明唔會對今次事件作出回應，原因係怕日後再有排山倒海嘅傳聞，萬一貴人事忙覆漏咗，俾人當佢默認就唔好喎。
講到尾，究竟火燎森有冇破到產呢？由於佢冇正式回應，華華又唔知火燎森嘅真名，暫時未能查證，所以答案仲係一個謎。

李華華
mailto:[email protected]