瑞典前鋒伊巴謙莫域早前就正式同曼聯解約，仲宣佈將會轉戰美職聯，加盟洛杉磯銀河。不過伊巴近日又偷偷地返咗曼徹斯特市，到底搞邊科？

原來伊巴今次返去曼市係為一間網上搏彩公司拍廣告，個廣告都幾搞笑，伊巴喺片入面扮演一個類似「最後大佬」嘅角色，原來以為佢會同飾演挑戰者嘅大叔打起上嚟，點知鏡頭一轉，兩個人就換咗套家居服裝喺餐廳High Tea。

雖然個廣告好無厘頭，不過都落足本，製片商仲專登請咗個演員擔任伊巴嘅替身，以防呢位瑞典球星喺拍攝過程中受傷，都幾大陣丈。

伊巴今次返曼市拍廣告都盡量保持低調，好多時都笠住頂帽以免畀人認出，不過又點會逃得出狗仔隊嘅法眼吖！拍完廣告之後，伊巴又要急急腳飛返去美國同球隊會合，銀河喺本周嘅聯賽將會硬撼同市球隊FC洛杉磯，預料伊巴到時有機會喺主場球迷面亮相。

-------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM