龔嘉欣今日喺柴灣以代言人身份，穿上露臍短褲裝為已合作4年嘅美容院拍攝廣告，佢指今次續約2年，酬勞係咪每年增加？佢話：「梗係，物價都會通漲，好開心慳好多，全身贊助，美胸、脫毛、纖體，拍完劇就可以搵外快。」

嘉欣透露今年上半年已拍咗3個廣告，包括護膚品、麵包店同美容院，佢話收入比上年升咗3倍，佢笑住話：「收到稅單，我對眼係發光，不過我會儲錢，希望12月我生日可以買到樓自住，買一間500呎細細哋嘅姑婆屋，因為身邊朋友都笑我話『姚子羚就快嫁，你算把啦！』因為我同子羚一齊住，我要諗定後路要獨居喇！」真係嫁？嘉欣話：「我都唔知，叫佢男友快啲求婚，冇理由女仔出聲。」嘉欣仲希望之後可以買多間屋畀家人。

有報道指佢早前喺劇集《幕後玩家》煞科宴上，同黃宗澤（Bosco）合照時好親蜜，嘉欣即刻話：「有少少唔公平，其實嗰啲相都係合照裁出嚟，變成我哋兩個人獨照，呢啲相喺《幕後玩家》私人groupchat入面，唔明白點解啲相會流咗出去，我要重申，我絕對冇飲醉酒，我係有飲香檳，但一啖都會面紅，所以幾唔公平。」

講到佢叫Bosco做老公，又叫Bosco媽媽做媽咪，嘉欣表示：「佢平時都會叫我做老婆，因為我哋飾演兩公婆，其實個個都係叫佢媽咪做阿媽，我都有同Bosco傾過呢件事，算喇，我話都係叫番黃生、龔小姐，最唔開心係私人groupchat相都會流出去，我冇諗住捉鬼，因為自己都有責任。」

唔擔心人哋話佢好「姣」？佢話：「所以幫我澄清，最冤枉係大合照變二人照，以後自己小心啲，檢點啲，我仲要拍多幾個廣告吖嘛！」