星期五主板成交1,169億元，同恒指比重調整有關嘅交易可能佔咗200億，但點七除八扣，都仲係大成交。問題係，大成交能否推得郁啲強勢股。睇住幾隻熱門股，會feel到上升動力一般。

首先，騰訊（700）超大成交193億元之下出現射擊之星；吉利（175）單日24億成交，只能勉強推高2%，15.5元樓不停有沽盤湧現；IGG（799）《王國紀元》5月流水3,880萬美金，數據靚仔，股價都先升後跌；至於傳統股份如內銀股，轉弱訊號早已出現。新舊經濟、強勢落後股票都飽飽滯滯，邊個能夠出嚟撐指數上升？

星期五收市後，唔會死錯人嘅恒大（3333）292億人仔沽萬科A股，遲唔沽早唔沽，曲線話畀你聽而家係高位，所以係時候要沽，又多一個利淡訊號。

話口未完，就睇住星期五晚美股爆出科網小股災，究竟會唔會出現年初至今最大獲利潮？確實有機會，莫講過近日急彈嘅科網股，其他板塊嘅主流強勢股，之前升得多嘅，都要食糊，因為呢股獲利潮絕不簡單。

好就好在，納指急跌而道指升，反映跌市只限於強勢股，相信沽壓快而急，亦會短暫，足夠同弱勢股縮窄差距就已足夠。至於資金會唔會流入超殘板塊？喺游資充裕下，機會不低，可留意商品股如江銅(358)、中鋁(2600)。

晉佳