白鴿黨港島區支部今日開會員大會，通過9月立法會參選名單。由於早前甘乃威夥同一眾中西區議員成功迫走黨副主席單仲偕，令到港島區成為白鴿黨唯一只有一份參選名單嘅選區。之前早有黨中人奇怪，甘威一向唔算係有計之人，為乜今次可以吓吓食住「單雞」呢？後來白鴿中人分頭追查，發現甘威今次咁掂，全靠背後做佢軍師嘅黨友黎學廉，而且成件事絕對唔簡單，因為黎學廉仲有另一個「神秘」身份，就係小甜甜爭產案主角陳振聰嘅軍師！

黎學廉發功單雞退選

有港島區支部中人對八方講，曾擔任南區區議員嘅黎學廉呢幾年掛住搵真銀，喺黨入面已經好低調，但間唔中都會同支部班兄弟聚頭。大約一年前小甜甜爭產案開戰無耐，佢不時向兄弟「預告」爭產案情，結果又真係畀佢講中陳振聰嘅動向，佢後尾更自稱有份為Tony陳出謀獻策。
原來黎學廉同Tony陳嘅左右手朱偉民的確好老友，八方查過公司註冊處嘅紀錄，發現兩個人早喺好多年前，已經喺豐采多媒體集團公司齊齊做管理層，當時黎係非執行董事、朱偉民做公司秘書，可見兩人關係不淺。黎學廉自稱陳振聰軍師嘅講法，亦都多幾分說服力。
講番港島區選情，當日單雞搵甘威傾協調，甘威指定要帶黎學廉出席，甘威全場粒聲都冇，全部由黎一個人講晒，佢揚言若果單雞唔妥協，佢哋會搞大件事，結果實會拖累白鴿黨全港五大選區選情！佢又講明如果單雞要以另一張名單參選，就要先退黨。
黎學廉其後再發功，出席民主黨座談會時，向一眾等上位等到上晒腦嘅第二梯隊，力銷甘威今次參選嘅象徵性意義何其大，一旦唔能夠參選，其他第二梯隊都唔使旨意有位上，最終成功喺黨內傳播「挺甘」嘅情緒。
單雞最後以大局為重退選，甘威求仁得仁。不過，黎學廉之後玩低調，唔再見佢現身。呢個時候開始有兄弟懷疑，成件事係咪淨係「挺甘」咁簡單？特別係Tony陳身家億億聲，背景又神秘，又盛傳佢同阿爺關係好到不得了，點解佢手下會插手白鴿黨嘅選情，會唔會另有目的？
好多識黎學廉嘅白鴿黨中人，聽到八方問呢單嘢，一係乜都唔講，一係就唔可以開佢個名，淨係得馮煒光喺八方攞住舊資料追問下承認，黎學廉當年介紹過一單宏霸嘅生意畀佢。當年同佢接洽嘅係一個姓朱嘅律師，即係後來做咗宏霸集團主席嘅朱偉民。宏霸嘅大股東，正正係陳振聰。

楊森話唔會影響部署

八方噚晚打電話畀黎學廉，但一開口問佢係咪向甘威傳授咗好多參選錦囊，佢已經話：「我唔方便答你呢個問題」，跟住好快已經收線。佢後尾透過楊森回覆八方，話佢從事法律事務，曾經代表過好多客戶，唔可以透露同個別客戶嘅關係。排喺甘威參選名單第二位嘅楊森又話，黎學廉係佢哋助選團成員，呢單嘢唔會影響佢哋選舉部署。八方噚日亦搵過甘威好多次，佢一樣冇覆電話。
講完一大輪，成單嘢真係古古怪怪，今日白鴿通過甘威份參選名單，都唔知係好事定壞事。難怪有白鴿中人話，萬一選舉開跑，畀人唔知揭啲乜嘢出嚟，咁就多得佢唔少！

mailto:[email protected]