【係咪白撞】福仔原來係加納人？ 前國腳自認係「真老竇」：只係想佢原諒我！
蘋果日報 2020/06/12 01:00
英超曼聯加納拉舒福特馬基耶
前加納國腳馬基耶（左），自認是拉舒福特的親生父親。
英超即將喺下個月嘅17號回歸，不過近日喺加納就傳出咗一個關於曼聯前鋒拉舒福特嘅有趣故事。事關一位前加納國腳馬基耶（Michael Boye Marquaye）喺接受電台訪問嘅時候，就突然大爆自己先係福仔嘅親生老竇，仲話自己之所以講出嚟係希望福仔可以原諒自己，不過相信福仔睇到呢單報道嘅反應可能係「黑人問號」。
英國傳媒就報道，原來呢位自稱係福仔老竇嘅馬基耶，其實一直都住喺英國。不過去到近日接受加納電台訪問嘅時候，馬基耶先提起自己同福仔有血緣關係：「拉舒福特就係我個囝，佢都知道呢一點，不過我哋已經有幾年冇見面喇！起初佢好憎我，因為佢覺得係我拋棄佢，但事實並唔係咁。好多人都希望搵我去講返成個故事出嚟，不過我唔係為咗賺錢同名利嘅人，我只係想將真相講出嚟。」
只不過喺曼聯官方網站嘅資料當中顯示，拉舒福特個老竇係牙買加人Jamaican Joseph Rashford，而媽媽就叫做Brit Melaine，從頭到尾都冇見過馬基耶個名出現。事情真相到底係點，就要睇福仔點回應喇！