【李八方online】遊屯馬綫長者fans包圍索簽名 田北辰嘟八達通成分鐘先入到
蘋果日報 2020/02/14 17:52
李八方ONLINE屯馬綫
田北辰帶同記者視察屯馬綫首日運作。張志華攝
屯馬綫一期今日通車，曾經做過九鐵主席嘅田二少，梗係約埋八方同其他記者一齊行吓。佢帶大家由沙田站行起，經大圍站，轉車去到屯馬線嘅鑽石山及啟德站，視察吓新開車站運作情況。
二少都幾細心㗎，望實每個指示牌，仲帶埋八方去睇吓鑽石山站新廁所。喺田少視察期間，好受婆婆級女性歡迎，不少銀髮族主動話要同田少合照，仲問佢拎簽名，被集郵嘅田少當然冇托手踭。
佢就同八方講，好多人忽略廁所，每個廁所其實代表每間公司文化，所以每次睇新站一定會睇廁所。佢話鑽石山站嗰男廁就麻麻，一入去廁所已經有積水，除呢樣外，大部份係讚嘅多，例如兩個轉車站指示都幾清晰，運作都幾暢順。二少話，因新型肺炎影響，搭車人流都少咗，暫時睇唔到係咪有分流作用，估計都要等疫情過咗，起碼3個月後先知。
唔少人關心屯馬綫超支，依家因為疫情，令到立法會傾超支嘅會都取消咗，港鐵遲遲未交代究竟超支幾多。二少早前話超支唔會超過150億，佢話依家延遲咗公佈，可以畀港鐵同承辦商再傾，或令到超支嗰價有得再壓低啲。佢話撥款未能休會前通過，有機會要停工，甚至要賠償畀承辦商。佢希望港鐵可以同承判商傾，盡量壓低超支金額去到110億至120億元，令議會反對阻力可以減少啲。
未出發之前，曾經發生小插曲。二少約咗大家喺沙田站等，點知佢一嚟到，用拍八達通嘟入站，就遇到阻滯，嘟咗近1分鐘、助理幫手下先入到。二少同八方講成日都搭地鐵，咁睇嚟都係似部閘機「曳曳」，唔畀田少咁易入站。