上周末剛啱陪完牧師囡囡宣誓，唔要有婚前性行為嘅馬局長馬時亨，難得一敍天倫樂，皆因佢成日馬不停蹄周圍飛，為香港搵商機，上個月尾，佢先帶團去咗油資出口國──沙地阿拉伯、阿聯酋嘅阿布扎比同杜拜，噚日搞個分享會，同幾位「團友」講吓中東之行嘅收穫。
呢次已經係肥馬唔夠一年第二次出訪中東，佢依然顯得好興奮，話成個行程可以用八個字講晒：「油資多多，商機無限」。又話，中東人已經將視線由向西望轉到東方，不過礙於對內地股市唔熟，香港正好擔任佢哋新絲路上嘅金融中心（FinancialCentreintheNewSilkRoad）。
中東油資豐盛，當地政府亦惠及國民，大力發展城市建設，所以今次馬仔帶埋金融、基建同房地產服務業代表一齊去，食正呢個時機，除咗見當地政金官員，亦有商會、財經界同地產界代表，希望促成多啲生意，佢仲鼓勵啲商家，多啲去中東。即係話，路就鋪好、線又搭晒，咪錯失商機喇。

5月轉戰哈薩克

有記者質疑肥馬去中東去得遲，唔夠新加坡快手，如果唔係，吸引嘅油資可能唔只咁少。肥馬回應，早遲唔係問題，遲唔代表冇商機，只要積極，一樣可以抓到返嚟，香港人最醒目，唔會畀商機走，政府都會配合幫大家咁話。
肥馬去得中東，當然唔會錯過拜會中東股神沙地阿拉伯王子Al-Waleed（圖），肥馬轉述呢位中東畢菲特稱讚香港嘅成就，並且對中國投資嘅興趣好濃厚，肥馬亦打鐵趁熱，返嚟冇耐，即去信邀請對方來港。
肥馬下一站，會喺5月隨港交所嘅鴨仔團回訪哈薩克，哈薩克總統扎爾巴耶夫上年12月嚟過嘛，呢啲叫禮尚往來。
[email protected]