當年今日
關於我們

【宣萱袁偉豪係臥底】演技大鬥法 《使徒2》嚟緊黃翠如火拼麥明詩…

蘋果日報 2017/09/28 07:10

宣萱袁偉豪使徒行者麥明詩

合拍劇《使徒行者2》今晚播映第9集,一如過往嘅合拍劇模式,大陸嘅觀眾可以搶先睇,話晒o依家啲互聯網消息咁發達,一撳個掣,乜嘢都會睇到!
喺周一《使徒2》嘅大陸版本已經播映到15集,不過劇情仍然仲係繼續係搵臥底黑警,繼周柏豪之後,喺下個禮拜嘅故事會發現宣萱係英國軍情六處嘅臥底(維基一早講咗),袁偉豪嘅臥底身分亦曝光,不過佢對住三哥嘅反應比較冷淡,甚至仲去咗張兆輝嘅墳前燒咗自己嘅警察委任證,於是乎有網民估佢係黑警!
做慣好人嘅陳豪,今次一改戲路做奸角,佢繼承老竇做坐館之後,雖然作風心狠手辣,不過對住宣萱又似乎好深情,為咗救宣萱而受傷,陳豪嘅胸口都有一個紋身,有網民話呢個紋身疑係一啲海、陸軍戰隊嘅標誌,鏡頭前多次有特寫,似乎係隱藏咗另一個秘密!
之不過一套劇點都要有啲愛情線拉番勻,「十優港姐」麥明詩喺下個禮拜,同魏焌皓會有感情線,同時因為黃翠如暫代宣萱嘅工作,於是同翠如有對手戲!麥明詩喺處女劇《賭城群英會》俾網民話佢「戲屎」,嗰種歇斯底里嘅演技,再加埋「死魚眼」同「章魚嘴」,感覺慘不忍睹,今次係佢第二套作品,雖然好似有啲改善,但係去到同魏焌皓嗰啲談情戲,似乎唔多feel到佢嘅甜蜜,可能只係甜在心,旁人難以感受!
empty
麥明詩嘅演技......(電視截圖)
empty
(電視截圖)
empty
宣萱原來係英國軍情六處嘅臥底!(電視截圖)
empty
袁偉豪都係臥底,但問題係,佢會否變節?(電視截圖)
empty
(電視截圖)
empty
有網民根據呢一幕燒警員委任證,估計袁偉豪已變節。(電視截圖)