立法會本月復會後非常「熱鬧」，除咗上周由特首林鄭月娥以「處女作」為新會期打頭炮，本周三大會亦有精采戲碼上演，何君堯會被民主派提出譴責議案，點樣還擊成焦點，但25日嘅大會更加不容忽視，政府會提出支持一地兩檢嘅無約束力議案，為方案開展三步製造「民意」，原來當日係一地兩檢方案出爐剛剛三個月、即係政府做公眾諮詢嘅慣有時限，有建制派不諱言當日發言會提及林子健事件，八方唔知民主派點迎戰，但相信獲護航嘅政府三人組輕鬆好多。
林鄭上周三發表首份施政報告為立會熱身後，今個星期三輪到何君堯令立法會升溫，皆因香港本土毛孟靜當日大會會向曾因港獨問題發表「殺無赦」言論嘅何君堯動議譴責。雖然建制派人數佔多，議案冇乜可能通過，但民主派同建制派兩陣營嘅發言，預料會擦出唔少火花。而喺譴責前夕，何君堯仲去信民主派求撤議案不果，俾民主派請食檸檬嘅佢，會唔會對政敵都殺無赦？

名正言順推三步走

但政界中人更關心嘅係25日嘅一地兩檢無約束力辯論，而正、反陣營當日發言內容，都不及辯論嘅時機同姿態咁重要，因為當日剛好係政府7.25提出方案嘅3個月，明顯要藉以此平台為方案作總結，然後挾立會喺建制派支持下通過嘅議案，名正言順推展「三步走」工作。
高鐵三兄弟包括律政司司長袁國強、運房局局長陳帆以及保安局局長李家超自必然嚴陣以待，但八方聽聞建制派比官員更「雀躍」，唔少人私下預告，若有民主派話一地兩檢會有內地官員跨境執法，一定會攞番林子健單嘢反駁，話為方案護航之餘又可乘勢批民主派，一舉兩得喎！

李八方