苗禮德與史卓豐暫停合作，不少苗廐馬轉由蘇兆輝接手，這位英國冠軍騎師有幾神勇，大家近兩戰有目共睹，即管睇吓佢同苗禮德會唔會擦出火花。

周三（12日）晚谷戰第四場四班1200米，苗禮德派出「龍騰摘星」爭香港高爾夫球會百週年紀念盃，這匹五歲自購馬首兩季毫無表現，上季尾苗禮德接手由四班起步，明顯低位反彈，質超第四班之馬，排11檔及重磅都唔擔心，強配可以再贏。

「龍騰摘星」加盟苗廐後，今季首戰跑沙田1200米，票數冷落但後勁強橫，追得第四猶如脫胎換骨，果然翌仗轉戰快活谷1200米即以超班姿態贏馬。

上場「龍騰摘星」起步被撞慢一慢，雖然可以走入埋欄表面看似着數，但對一匹接近1200磅身長步大之馬而言，則未必係好事，結果在連番碰撞下，好不容易末段有位追得第二，被頭馬「陽明亮亮」走甩甚感無奈，敗不足辱。

「龍騰摘星」落敗後好快已由蘇兆輝接手出試兩課，工夫一早做好，論態依然咁靚，環顧今場對手，部分之前贏完已無分利可言，較質新的馬又未見佳處，反觀「龍騰摘星」此際才重新振作，五歲馬進步未止，有好騎師蘇兆輝壓陣，可睇高一線。