選美活動，明爭暗鬥在所難免。好似今屆香港小姐，台上已爭過你死我活，司儀問11號李明芙選到邊個贏咗最唔公平？佢諗咗一陣就答「14號何泳芍」。(相關新聞﹕ https://bit.ly/2N04fMw )在台後，9號嘅工藤佑采疑不憤輸咗都要繼續出場做佈景板，被監製爆要氹先肯出場，仲自封「Poker Face」。(相關新聞﹕ https://bit.ly/2NHX7Bw )今屆港姐日前都有私下搞咗個雞煲慶功，但就唔齊人，大合照中見四人缺席。

不過，又唔係每屆都係咁，2003年嘅冠軍曹敏莉（Mandy）、亞軍楊洛婷同季軍戚黛黛都真係可以友誼永固。佢哋三位都升呢做咗幸福人妻，Mandy喺2010年嫁俾金融才俊張家傑，先後誕下一女兩子，現時主力相夫教子;楊洛婷樂隊Dear Jane主音男友Tim，今年2月亦斥資逾二千萬，購入西貢大屋同囡囡一家三口居住;仲有黛黛前年與機師男友Calvin結婚，暫時仲係過住二人世界。

今日係Mandy嘅36歲生日，當年嘅亞軍同季軍都專登盛裝打扮同佢食個brunch。Mandy今日都係喺ig貼合照，並留言﹕「elebrating my birthday with my dear girlfriends #15years #Crazy&Sweet」。網民都留言激讚﹕「話晒佢哋曾經都係你嘅對手，依家重可以咁老友，認眞難得！」

精選娛聞，喺晒《娛果》 http://fb.com/appledailyent