Send完CV出去，再收到電話約你去見工，跟住你會點準備呢？熨定衫？執定晒過往公司推薦信同埋學歷證明？還是睇定地圖搵清楚條路點去？答案以上皆是，不過仲有一樣好重要，就係search吓間公司做乜。

問吓Google大神係正常做法，我唔教你都識，不過要留意有啲公司名同佢嘅產品或業務未必100%掛勾，我有個活生生嘅例子，一間好出名嘅電器代理商請Marketing，個求職者諗好晒佢幾隻電器牌子點宣傳，上到去做test竟然要寫一隻健康食品嘅推廣計劃。

睇返個公司網站，佢又真係冇呃你喎，個網有100種電器，但零零丁丁有隻健康食品，原來係開始打呢個市場，亦因為咁而要請一位新嘅Marketing。

搞得掂賣乜，又要了解吓件產品，見CS職位你要知呢啲產品一般會收到咩查詢；見HR職位又要睇吓呢個行業需要請咩人；見Marketing或者Sales就唔使講啦，噏得出有咩賣點係基本，做足功課就算即場爆肚度橋都冇難度。

保留最初你見到嘅JD（招聘廣告）都好重要，通常喺段稿入面都會見到份工嘅端倪，而家咁講好似好容易，但係當你send咗幾廿份CV出去之後，某日突然有人打嚟話叫你見工，嗰一刻就會手忙腳亂。

所以見工唔懶得，唔係間間公司都好出名，好多都要搜尋一下佢做咩業務或產品，上去公司網站睇就最穩陣，順手Google埋公司有咩新聞，我試過搵新聞時見過啲不知名貿易公司原來係做傳銷，有唔少苦主公開受騙經歷，咁就真係唔好浪費時間同車錢去見工喇。


專欄作者簡介：
辦公室日報　聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/