當年今日
關於我們

【拍《睇真D》搵命博】韓國百貨公司倒塌 林祖輝深入地道﹕死咗冇人知

蘋果日報 2018/09/12 00:00

解剖羅玆威爾外星人今日睇真D林祖輝

「仆街,亞視嚟架喂!」認真講,亞視節目有幾多人有睇?林祖輝喺亞視工作近十年,演過《豪門》、《97變色龍》、《英雄廣東十虎》等劇集,但印象唔深。反而記得佢主持過《今日睇真D》,收視贏開巷,更逼到大台要製作同類節目《城市追擊》。
林祖輝話﹕「以前真係好落本,百幾二百人做一個節目,嗰班人好fit。現在每個電視台嗌救命,又裁員,邊有錢去做,本來四日都縮到兩日拍。」
當年最具爭議性嘅「解剖羅玆威爾外星人」,幾分鐘片段播足一星期,雖被批評雷聲大雨點小,但卻成為不少香港人集體回憶。惟當年拍攝《解剖外星人》的梅拉里斯(Spyros Melaris),去年終承認片段中嘅外星人係假嘅,喺肉檔購買牛羊內臟當成是外星人嘅內臟,並且是在一個住宅單位內完成拍攝。(相關新聞﹕ https://bit.ly/2MoXF2S )祖輝表示當年亦有抱懷疑態度﹕「諗住係霍氏電視台買返嚟,唔會太假,仲搵埋曹宏威博士去分析,用客觀態度去處理,好大迴響,但分五日又真係太多,三、四集可能點到即止仲好,但以電視台角度,咁貴買番嚟,一日播晒就回唔到本。」
祖輝話當年自己日飛夜飛,要去不同國家做採訪,最難忘係漢城三豐百貨倒塌意外,祖輝與導演實地報導。當年懷著膽大心細,做咗獨家報導,祖輝一臉自豪話﹕「我同導演去到現場,都係一片平地,見到有個窿冇人就行落去,其實好危險,因為隨時可能再有倒塌,真係死咗都冇人知。但我哋一路行落去係通行無阻,落到basement,見有工作帽就戴住扮工作人員,期間見到有人抬住傷者出去,咁我哋拍到獨家嘢。當年《城市追擊》係由智叔(廖啟智)去採訪,兩台競爭好激烈,邊個拍到獨家嘢,無論觀眾或行內人都會睇到,做好啲自己都開心。」
採訪﹕嵐山
攝影﹕葉君海
攝錄﹕廖達燊
場地﹕ROOKIE(沙田分店)
精選娛聞,喺晒《娛果》 http://fb.com/appledailyent
empty
林祖輝曾任《今日睇真D》主持,每次做到獨家採訪都會引以為傲。(攝影﹕葉君海/資料圖片)
empty
當年嘅「外星人」片段分五集播,惹觀眾反感。(資料圖片)
empty
亞視《今日睇真D》收視高企,屢挫無綫。(資料圖片)
empty
「大姐明」林建明率領林祖輝、林韋辰等做《睇真啲》。(資料圖片)
empty
祖輝好喜歡踢足球。(資料圖片)