對於號稱係「全球首個購物藝術館」嘅K11，彤叔個愛孫鄭志剛當正係親生仔一樣。心肝椗出世之後，今年第一次搞聖誕除夕活動，成個天幕廣場佈置到金光閃閃，但最特別嘅係個場竟然搵咗唱投訴歌唱到出晒名嘅「香港投訴合唱團」八個成員，除夕晚11點用報佳音形式曲線鬧爆政府，迎接2012年。
香港投訴合唱團成員之一嘅Vangi話，為咗「配合」商場活動，今年唔會直接唱衰政府。為咗對抗「河蟹」勢力，佢哋惟有一改歌路，借助文字力量將市民嘅投訴變成願望，表面讚「Donaldyoudidagoodjob」，但實質句句有骨落地。
Vangi直言，今次填詞難度大增。例如「紅館加伊館成萬呎也未夠，花多少少錢去搞亞運，來起多幾個場地確有着數，多啲歌星搞個唱」。唔使Vangi解釋，都意會到係寸政府唔理民意堅持申辦亞運。仲唔明，咁畫埋條腸出嚟喇：「究竟辦亞運係一件咩事？會唔會只係做一個show？」

投訴合唱團表演

部份歌詞內容仲大膽到連強國政府都寸埋一份：「和平不再只有空凳去頒獎，期望切實造理想之國」、「下次香港啲記者上去採訪，如遇上被摑亦有公安救。」Vangi話歌詞題材主要係回顧過去一年大事，同埋反映普羅大眾嘅心聲，無論係學生讀書嘅辛酸；打工仔日做夜做嘅苦況；抑或樓市問題，都一次過唱晒出嚟。歌詞靈感嚟自facebook，加埋團友心聲，不過大作仲未完成，大家有嘢想投訴，可以去網站 http://www.facebook.com/k11artmall畀意見。
香港投訴合唱團舊年喺香港成立，概念嚟自芬蘭，收集市民對社會嘅抱怨同不滿，寫成抵死歌詞周街唱。舊年7.1佢哋憑歌唱盡施政失誤同打工仔壓力，引起共鳴：「點解點解永冇放工？點解點解老細冇用……天星鐘聲冇晒記憶，西九諮詢冇晒意義，喂冇晒平價樓買……。」

mailto:[email protected]