恒指昨日埋單跌132點,唔算重災,但係魚缸戰友好多都年初四咁嘅樣,無他,好多炒股都跌到一仆一碌,大市更乍現三大凶兆。
第一,龍頭股散水。舊年三大藍籌狀元︰騰訊(700)、銀娛(027)、金沙(1928),前兩者已經由高位插水兩成,傳統上已定性步入熊市,舊經濟股始終未全線復蘇,大市群龍無首,有危機!
第二,炒股無厘頭大跌。十大跌幅榜中,不乏熟口熟面細價股,包括中國家居(692)、21控股(1003)、鵬程亞洲(936)等,其中中國家居急插四成,成交億億聲,唔排除係孖展斬倉盤,弱市下隨時做成骨牌效應,慎防洗倉活動越演越烈。
第三,企業抽水活動頻頻。先有新鴻基地產(016)發紅利認股證及新世界(017)供股,再有和黃(013)減持屈臣氏股權,新近再嚟招商局(144)變相供股,再加上金山軟件(3888)發換股債,以上種種無不顯示公司們搵水心切。
老老實實,佢哋對環球經濟最新情況清楚過你同我,睇淡後市之心可想而知。