譚詠麟(阿倫)噚晚喺台北小巨蛋舉行「銀河歲月40載世界巡迴演唱會」，等咗咁多年終於成為小巨蛋主人，呢場個唱對佢嘅講係唱歌生涯另一個高峰，佢以經典歌《像我這樣的朋友》打頭陣，之後感謝台灣觀眾，等佢有機會圓夢。譚校長話自己原本喺90年有機會喺台灣開騷，但嗰次唔知為咩事冇做成；譚校長喺演唱會時又提到自己曾喺台灣住過。
譚校長邀請咗女歌手A-Lin做嘉賓，佢哋兩人合唱番舊年推出嘅《遊子》，而喺傾偈期間，A-Lin對高踭鞋個踭kick咗喺台罅，好彩好快整番出嚟。

阿倫以一半嘅國語歌曲表達謝意，笑話：「我的華語說的不太標準，就用唱的來感謝大家！雖然來過小巨蛋當嘉賓，這次是我自己的場子，準備了很多精彩的演唱會內容來歡迎賓客，讓每個來看我演唱會的粉絲，覺得這是一場物超所值的演唱會，這樣我當主人也才有面子。」

除咗演繹多首經典金曲外，今次特別將一啲非主打歌，重新編曲送給歌迷，阿倫話：「每一首歌對我來說都是一個紀念和意義，在懷舊的氣氛中，塑造出不一樣的演唱會。想問問歌迷，你們多久沒有聽到這些歌曲了。」

encore唱出《朋友》時，電影《黃金兄弟》一班演員曾志偉、鄭伊健、陳小春、錢嘉樂、謝天華、林曉峰6人現身，一齊大合唱阿倫開心話：「他們夠義氣，說來就來，大家一起熱鬧，這樣真得滿好，也很開心，這就是朋友、兄弟。」

至於台灣天團五月天嘅阿信噚晚喺場館熄燈後低調入場睇騷，譚校長後來爆話原本想請五月天做嘉賓，不過因為五月天今日要演出，所以阿信特別為校長留喺台北，睇埋騷先去會合隊友。

精選娛聞，喺晒《娛果》
http://fb.com/appledailyent