當年今日
關於我們

701收料站:中建數碼或有沽壓

蘋果日報 2002/01/14 00:00


中建數碼(1169)自從由阿媽中建電訊(138)注入手機業務後,周圍都唱好,話係海爾借殼上市。上個星期六公司重帶咗成班證券界人士北上參觀。不過,經紀陳話中建數碼股價今個星期可能會有多少暗湧。
佢解釋話,中建數碼舊年12月進行嘅批股行動分兩部分,第一部分以先舊後新方式,批出12.81億股,由於唔係太多貨散出街,所以除咗復牌第一日勁插兩成幾外,好快趣已經升番上40仙樓上,兼且守得好穩陣。
不過,中建數碼亦同時以30仙一股,配售咗第二部分3.68億股新股出街,交易完成日期係今個星期三。呢批股份同第一部分有多少唔同,就係有好多街外投資者接咗。
公司喺新股出籠之前,請證券界上去睇廠,係想加強投資者嘅信心。不過金融市場現實非常,若果市價較持有嘅新股成本高出接近50%,唔套現獲利,又好似對自己唔住。