谷戰焦點馬房首推沈集成，蓋沈廐在季內已舉行的五次谷草夜賽中，每次一Win密食當三番。不過另一鬥志鮮明華倉葉楚航亦不能忽視，須知葉廐近兩個賽日都有馬贏未斷纜，現以12Win領先龍虎榜。
葉廐由9月28日開始，近六匹頭馬皆由洋將勝出，當中雷神及郭能各佔其二，餘下兩Win則由韋達及潘頓瓜分。今戰葉廐出四駒，第三場「旅遊一哥」、第六場「好老友」及第七場「定做領袖」分別配潘頓、雷神及史卓豐。當中「好老友」季內未交代，近兩場俱用吳嘉晉，今次轉交雷神操刀兼打王牌，看來不似無的放矢。
另外，葉廐近兩匹谷草頭馬「香港興旺」及「大寶庫」同樣勝出一哩，前駒贏完再用黃皓楠減十磅爭二班一哩，報名亦有出王牌，人馬之前合作三戰一冠一季俱跑同程，僅1800米一役不上名，亦有機會替馬房延續勝勢。