台灣電視台再傳大裁員，繼去年三立同八大爆發裁員後，據台灣報道指隸屬旺旺中時媒體集團旗下嘅中天年後因不堪虧損，至今已裁掉上百名員工，對象大多係公司中層主管，包括戲劇中心部門，去年喺冇預警之下停播徐乃麟《天天樂財神》同《碰碰發財星》兩個節目製作單位等，共約30個員工全數被裁。

對於此事，旺中媒體集團副總裁邱佳瑜未有回應，該報記者再向另一名不願具名嘅中天高層求證，對方亦只話：「不好說。」未有否認裁員一事。

中天以往雖然製作唔少戲劇，同時都買咗唔少中國劇，始終叫好不叫座，而且o依家觀眾都係上網收睇，因此好難反映收視如何，尤其被指「冷灶」嘅中天娛樂台，繼去年停播徐乃麟兩個節目後，至今仍未開播新節目，該頻道即將播出孫儷6年前嘅主演《後宮甄嬛傳》，呢套劇曾掀起收視熱潮，雖然至今仍有唔少觀眾期待重播，但畢竟係舊戲，難免讓人聯想電視台係為節省成本。