韓國男神金秀賢、男團FT Island成員李洪基、女星蔡妍等人近日都打算將興趣變成職業，早前報道指男神等人已經遞交申請書參加韓國職業保齡球第22期選拔賽，而選拔賽將於後日、大後日舉行第一輪嘅選拔，而大會將會聽日進行召集，不過大會方面就表示基於安全問題，故所有參賽嘅藝人將不會參加聽日嘅召集，只會於選拔賽當日先現身，唔知粉絲有冇機會可以見吓偶像打保齡球嘅英姿呢？

另外，男神為咗成為職業球手，近日放低手頭所以工作，頻頻練習，而金秀賢嘅教練受訪時就大讚金秀賢夠勤力，至於男神嘅實力？教練表示：「之前金秀賢曾經話過自己最高紀錄係250分，不過已經係3年前嘅事，依家佢比之前勁咗好多。」教練又指金秀賢嘅實力已經屬於中上級：「依家嘅分數已經係297分至300分嘅程度，儘管保齡球更注重平均分，但金秀賢依家平均分都有190分以上，係好好嘅成績。」