日本男星向井理當年因為一套NHK電視台晨早劇場《鬼太郎之妻》而走紅，噚日NHK台開記招，宣佈下年春天開始播放嘅新一輯晨早劇場《當家姐姐》嘅卡士，除咗早前公佈咗嘅女主角高畑充希同川榮李奈之外，原來向井理都有份演出。

噚日記招當中公佈咗大部份《當家姐姐》嘅卡士，向井理今次係相隔6年再演晨早劇場，佢話：「隔咗成6年咁耐，能夠再演晨早劇當然好興奮，雖然可能有啲辛苦，但係我會全力支持主角。」

至於前AKB成員川榮李奈今次執支好簽演晨早劇，AKB監製秋元康都鼓勵佢，不過，喺AKB習慣亂講嘢嘅佢，又發揮亂講本色，劇中扮演佢爸爸嘅係男星PierreTaki，而Pierre剛剛代言一隻消臭劑，川榮竟然話：「我係扮演消臭劑個女！」真係吹脹。