市傳中聯辦早排有人搵過港交所（388）行政總裁李小加食飯，結果停咗牌九個幾月嘅中國高精密（591）無幾耐就復到牌。李總噚日同華華食晏時抓緊機會澄清，話高精密復牌同佢無關，佢有位舊同學喺中聯辦返工，兩人不時食飯就真嘅。

間中食飯聚舊

李總係內地人，中國廈門大學畢業，之後先再去美國讀碩士同博士，所以佢話有舊同學喺中聯辦返工，得閒食飯聚舊真係唔出奇，奇就奇在，高精密以「國家機密」咁鬼新穎嘅理由做擋箭牌，又真係復到牌，口痕友難免將兩件事拉埋嚟講，關唔關李總事，真係佢先知。
既然李總喺中聯辦有舊同學，咁佢同國務院港澳辦主任王光亞又熟唔熟呢？李總一聽到王光亞個大名就即刻落閘，強調自己好少出席政治場合，王光亞曾經參觀交易所，兩人係有影過合照云云，總之都係劃清界線，費事大家講到佢同內地政治人物好有關係咁，做過記者嘅李總果然識答問題。