勇士周一以總場數4:1擊敗騎士，三年內兩度贏得總冠軍後，慶祝活動仍然未完，繼日前喺奧克蘭舉行勝利巡遊後，大軍周五又獲得拉斯維加斯一間度假俱樂部款待，乘坐私人飛機抵達當地度過周末假期，據報周末仲會齊齊睇重量級拳賽。喺慶祝嘅同時，勇士管理層同樣有正事要辦，皆因球隊今夏面臨10人約滿，包括2015年總決賽MVP伊古達拉（Andre Iguodala），慶幸據美國傳媒報道，33歲嘅「小AI」已經同勇士接近傾掂數，將會以年薪約800至1,200萬美元續約。一旦順利成事，勇士就有望展開同史堤芬居里（Stephen Curry）頂薪續約，以及杜蘭特（Kevin Durant）放棄頂薪等談判事宜，有望留住最大部份冠軍班底！

講開勇士自然唔少得提吓騎士，到底喺KD抑或勒邦占士（LeBron James）「組團」罪名大啲，雙方球迷依然各執一詞，占士周四就喺隊友嘅podcast節目開腔，表示唔認為自己係組團先驅：「喺2003年，湖人結合咗卡爾馬龍、披頓、奧尼爾同拜恩…1996年，火箭令巴克利、奧拉祖雲同德士拿聯手。我絕對冇掀起superteam時代，如果呢樣係佢（祖蒙特格連）嘅意思。但我鍾意呢種感覺──當你慶祝奪冠時，腦海仲有我嘅喜好、我嘅名字，I love that.」