日本女星綾瀨遙今日出席佢同男星齋藤工主演嘅新片《高台家的人們》喺東京舉行嘅謝票活動，呢套戲改編自漫畫家森本梢子嘅人氣漫畫，佈景幾華麗，喺片中齋藤工就成個白馬王子咁，綾瀨就好似公主一樣，所以謝票活動上，就安排咗齋藤工為綾瀨戴上后冠一個環節，似足港姐加冕咁。

原來個后冠值成3億日圓（約2,170萬港元），齋藤工攞起個后冠時手都震晒，連戴落綾瀨個頭度時都仍然震緊，綾瀨話：「我感覺到齋藤工好緊張！」司儀仲要嚇齋藤工，話跌咗落地要賠，齋藤就話：「我都驚跌咗粒鑽石落綾瀨小姐個鼻度！」戴住咗后冠嘅綾瀨被受影響下都緊張埋一份，聲都震晒咁話：「咁閃閃發光嘢東西，果然係有一定重量！」而呢套電影，已經決定會喺今個月舉行嘅上海電影節上映。