社交媒體上，常見自稱公關仔、公關妹之類admin，巨細無遺形容「阿客」點樣點樣低B、無理兼無能，好似client side 無個好人，無忽好肉， 或者咁，做為「阿客」嘅你，要唔要反省下？

其中一個 令agency 常常不滿的是 ，有些mean 爆兼卸膊的 client ，有福唔同享，有難要同當，campaign 成功是他策略成功、領導有方，失敗了就永遠是 agency 無料、辦事不力，一個唔該就把責任推得乾乾淨淨，最多下次揾過叧一間作為向管理層交代。這種客戶，長遠來說難以建立穏定可靠、肯幫你賣力的外援班底，是否好事，你諗你。真的當 agency 係 partner ，就該認認真真同人一起分析死因，一起改進，共享成果。

有時， 同一組外援，别家公司用，就發熱發光，你用，就強差人意。其中一樣令agency 難以發揮的，是因為太遲介入。不是說 公關角度大晒，但早啲考慮埋，效果肯定更彰顯。小如為活動擇日有乜宜忌（有冇撞同類活動？有冇撞政經大事？ )，大如炒工運領袖的部署、敏感議題的風險評估等等。但個人經驗是阿客總有阿客嘅難言之隱，次次都 last minute 至揾外援，不管之前你已苦口婆心講咗幾多回。

總之，信任和尊重都係要雙方面的，好多client 因為經年洗腦，對自己的品牌訊息信到十足十，愈講愈不能自拔，渾然不覺說出來人家一千個問號，如果這時你的agency 敢於挑戰你，你應該感謝對方一萬次，而不是以堅離地姿態死撐，坦白說，唔係認真對待你，誰有興趣當醜人？

彭瑪莉

蘋果財經，關心你飯碗
http://fb.com/appledailyatm