監管加熱煙嘅問題，最近火頭燒到公民黨法律界議員郭榮鏗（Dennis），事緣加熱煙生產商Philip Morris International嘅公關早前曾向傳媒稱，有關《吸煙（公眾衛生）條例》對香煙嘅定義，其實與加熱煙原理唔同，仲溫馨提示「可找郭榮鏗議員取法律意見」，令到大家質疑Dennis甚至公民黨對此事嘅立場，Dennis當時回應指「咁搞笑？」，強調無接受煙商款待；公民黨則急急發聲明，申明反對引入或合化法電子煙同其他新煙草產品。

事隔幾日，Philip Morris International嘅公關阿頭，今日因應近日嘅風波去信郭榮鏗，向佢致歉。佢喺信中解釋，只係因為有啲記者問佢哋，想了解多啲有關電子煙嘅法律問題，因為Dennis係法律界議員，相信佢係合適人選，所以先推薦Dennis。八方問過Dennis，佢都多謝對方還佢清白。