唐寧今年會加入出書行列，她將會與剛由法國留學回港、鄧達智堂妹左子齊齊出素食cook book，兩人日前在銅鑼灣拍宣傳片。已經食素兩年的唐寧說：「本身煮嘢食嘅知識唔多，近年轉咗食素，所以咪諗住自己出書，經過今次之後，愛上整嘢食，原來唔係太難。」與此同時唐寧亦宣佈陀B三個月，可謂雙喜臨門！她笑稱籌備這本書的時候，已經有一種陀B的感覺，想不到原來自己真的陀B，她說：「呢次係計劃之內，我同老公商量過，囝囝𠵱家三歲多啲，如果要生就差唔多時候，仔女都冇所謂！」

有B唔停工

唐寧已經同兒子俊俊講即將做哥哥，她說：「我有攞啲照超聲波相畀佢睇，檢查BB心跳嗰陣，又叫老公拍低咗啲片，俊俊成日都有問我攞嚟睇，我同佢解釋小baby喺蛋蛋瞓咗覺，俊俊即刻扁嘴，扭計，佢話覺得小baby好可愛，好想攬住佢，好期待做哥哥，我冇諗過佢會咁開心。」
問唐寧懷孕期間會否停工休息？她笑說：「唔係太辛苦嘅會繼續接，唔會完全休息。」她對近日網上瘋傳她「孭B」去禾輋買餸照片，獲一致盛讚是賢妻良母，她笑說：「好多謝網友有感而發去寫，多謝大家支持。」
採訪：盧妹
攝影：陳順禎
場地：Private Lounge by Miele