馬會自行製作賽馬節目以嚟，觀眾評價一直有彈冇讚，馬會影視部喺今季開鑼前，終於肯立定決心改革，喺節目主持方面更加大換血，引入唔少新面孔。

經過差不多一季，似乎今次嘗試並冇提升到節目質素，部份馬迷嘅反應更加認為現時嘅賽馬節目水平，仲衰過以前，唔睇都罷。

馬會幾個重點賽馬節目，觀眾最多負評嘅係賽日嘅《賽馬直擊》同賽前嘅《胆識過人》，幕前主持人自然首當其衝成為馬迷批評嘅箭靶，貼馬唔準、揀晒幾大熱門、分析廢話連篇，總之乜都有人唔滿意，有啲馬迷仲絕到將電視調校去靜音模式齋睇畫面，等到入閘先開聲聽沿途走位。

賽馬節目反應負評不斷，若完全將責任推晒喺幕前主持人身上，真係唔多公道。賽馬節目製作係台前幕後成個團隊合作，主持以外仲有監製同導演等等唔同崗位，主持人主要喺幕前面對觀眾，若果冇其他崗位配合同支援，出嚟嘅效果自然好極有限。

監製係成個節目嘅靈魂，點樣同主持人磨合兼擦出火花好重要，但好明顯馬迷睇到嘅馬會節目，似乎就係維持幾十年唔變嘅框架同模式，冇諗過點樣突破同畀啲新意馬迷。或者馬會賽馬節目冇收視壓力，反正做成點阿公都會出錢繼續做落去，結果係幕後更加不思進取、不求進步。

老實講，家陣馬迷除咗馬會官方賽馬節目，同畀錢睇收費電視賽馬節目，網上平台亦有好多賽馬頻道選擇，呢啲網上頻道資源同馬會冇得比，但內容就真係畀到唔少新意觀眾。不過，免費電視頻道賽馬節目始終受眾最多，希望馬會影視部喺歇暑期間認真檢討，下季真係提高返節目質素。

阿Joe