微博被封嘅黃耀明，日前參加6.22公投行動，到港大實體票站投票時，提到一國兩制同白皮書，當時明哥話:「我冇一頁頁睇，但感覺似係佢哋想話俾港人聽，一國係一制，佢鍾意撳邊個掣就邊個掣。」

同樣於微博被封、被填詞人梁栢堅形容兩人是「網上政治犯」確定嘅黃偉文，喺為李克勤填詞嘅新歌《北京‧北角》中，形容一對情侶關係時，代入成「北京」同「北角」:「北京北角　金紫荊對開許過願以愛熱溶　那界限線就怕最尾發現　南北竟不過電二人同居　先變大戰」、「北京北角是一心兩面並無所想那樣遠何來真火隔夜怨？怡情小吵，也就算」。不過喺MV中，卻是由戀人故事，變成「維穩」故事，一對小情人變成比喻「一國兩制」，未知創作者是否同意？

之前黃偉文、林一峰同克勤於今年5月在微博對話中，曾透露過寫《北京‧北角》一曲點滴，克勤先謂：「一早知道林一峰和我一樣愛早起，但到合照時才發現原來我們都愛賊仔帽，都愛同一個運動服牌子，還有還有，都愛這份發人深醒（省）言之有物令人會心微笑的歌詞。」一峰就話:「《北京北角》這份歌詞越唱越有畫面，克勤唱故事[good]，黃偉文的點子[good]」

黃偉文就回應:「尤其在這個時候，好想寫一首『北京』和『北角』最後能排除萬難相親相愛的故事，謝謝李克勤、林一峰又肯『陪我癲』，希望人同此心。」克勤就回應道:「可以一齊癲是件開心事。」

黃偉文於6.22公投行動上，絕不退縮，亦不怕在微博貼PO，在爭取同志平權上更是同明哥、何韻詩等人齊齊並肩作戰，一首《北京‧北角》，出自黃偉文手筆，令人不禁聯想到謝安琪演繹嘅《囍帖街》。同樣憑地名寄意，《囍帖街》顧名思義講囍帖街，但《北京‧北角》原意係點呢？黃偉文可是另有弦外之音？排除萬難相親相愛，就能夠化解所有問題？