花旗股市靠穩，㗎仔股市大升，A股亦繼續炒上，昨日港股一於照跟，唔使好大成交，恒指已經抽高193點收市，仲好醒目咁上番兩萬點，咁喺長假期前嘅最後1個交易日，港股會唔會繼續抽上？單睇技術走勢，今日冇乜理由唔升，不過，睇埋成交始終有啲唔放心，雖然假期前指數企喺高位對大戶有利，但昨日挾咗咁多上嚟，指數又啱啱企喺50日線，仲有幾多人跟呢？不過，嚟到呢個位，係好淡對決嘅關鍵時刻，隨時都會有大變，買貨過長假都係細細注好嘞。
港股第一季走勢麻麻，第2季嘅表現會受市場憧憬，基本喺第一季落後咗，通常都會部署喺第2季追番，如果大家睇圖，會發現幾隻大藍籌已經部署炒上，若外圍個市就嘅話，6月尾嘅恒指應該比3月底高番啲，亦有可能升番上年初高位，但係個市唔會直線上升，中間嘅波動唔容易捕捉，亦會有好多驚險場面同震倉活動，所以唔可以話睇好就揸重貨，尤其係炒短線同埋炒輪，保持靈活性最緊要。

除地產股外，滙控（005）係最有機會被大戶挾上去嘅股份，不過138元阻力好大，一定要升破咗先至有作為，𠵱家唔好咁快追貨。
中海發展C輪3508：中海發展（1138）昨收13.24元，大成交上破阻力軌，睇個勢會再試14元，破位睇15元，可以吼吓隻中海發展C輪3508。3508昨收5.65元，槓桿率2.3倍（有效2.3倍），仲有58日壽命，負溢價1.6%，炒呢隻輪，宜採速戰速決策略，正股升至14至15元區域，伺機沽3508獲利，正股跌穿12.50元止蝕。