美國Tesla電動跑車右軚版Model S上月尾終於抵港，財經界當中，出名係電動車粉絲嘅合和（054）太子爺胡文新（Thomas）都係買家之一。雖然係富二代，但佢似乎冇乜優先權，唔算本港第一批收車嘅顧客，佢都要等到呢個月9號先至收到呢部黑色Model S。
Thomas呢部Model S屬於最貴嘅級別，聽聞加上各類配套，價值約百萬元，佢收車當日即刻揸住部新車周圍走咗幾轉。相對佢之前部寶馬，佢讚Tesla呢部仿跑車喺上落斜、加減速時，表現出相當高性能。

深灣豪宅寓所設充電站

佢認為，揸電動車就好似用手提電話，「𠵱家大家好多時喺瞓覺時幫部電話充電，揸電動車亦係夜晚泊好部車叉電」，家住深灣豪宅嘅Thomas為車位設置「慢叉」，6至8句鐘就可以為部車叉滿電（半滿已經夠行200公里，相當於來回中環至屯門三次）。
佢仲打趣話，𠵱家駕車經過油站都覺得幾好笑，因佢部車毋須入油，走入油站仲可能被人鬧㖭！

曾送日產LEAF給爸爸

Thomas係推動本港環保交通工具嘅一分子，早於2006年為公司車隊引入混能車，之後分別喺2009年同埋2010年，買入港產電動車MyCar同埋三菱電動車i-MiEV，2011年日產推出LEAF電動房車，佢又買入兩部，一部公司用，另一部送畀爸爸胡應湘，胡應湘𠵱家都係揸緊呢部LEAF。

胡文新又指，相對普通汽車嘅油錢，電動車所花嘅電費較便宜。佢粗略估算，公司改用一部電動車，每年可以節省7至8萬元油錢。
至於叉電方面，喺獨立屋安裝充電站當然最方便，喺多層大廈安置充電站涉及電費誰付嘅問題，亦係可以透過磋商解決嘅，加上港人嘅環保意識強，佢認為香港十分適合電動車發展。

李華華
mailto:[email protected]