受力捧嘅「喚雨」，近期孭飛嘅電影同師奶劇都仆到直一直，唔單止冇人可憐，而且仲有好多幕後好心凉。事關喚雨越紅越囂，搞到犯眾憎，已經有幾位老友不約而同跟關仁數臭喚雨七宗罪。
喚雨除咗開工例牌遲到早退、成日掛住打機外，一直對住fans同記者表現得好親切嘅佢，對住自己友時嘅態度原來差到冇人有。
話說有幕後搵喚雨簽名留念，俾喚雨當面拒絕，搞到要保母幫口喚雨先肯簽個大名，但喚雨簽完後竟然一手將個簽名掟番畀個幕後，態度差之餘簡直係侮辱人。

拍劇狂食螺絲

另外有一位幕後試過搵喚雨錄句口號，係咁意提喚雨幾句，喚雨就好不滿咁鬧個幕後話：「得啦，我又唔係第一日出嚟撈，唔使提我。」結果喚雨咪錄到一鑊泡囉！唔單止咁，有日佢同花旦「小羊」拍場有幾頁紙對白嘅場口，喚雨因為唔做功課搞到狂食螺絲，結果要導演差不多逐句逐句同佢拍。
喚雨一向覺得自己演技好，但其實來來去去得一道板斧兩個表情，唔少演員同幕後都背後取笑佢嗰道板斧叫「喚雨反應」，就算佢啲老友「忠直」同「高佬」，都不時勁學佢做「喚雨反應」。另外，傳整過容嘅喚雨原來對「整容」兩個字好敏感，每次聽到呢兩個字都黑面，皆因佢以為人哋講緊佢吖嘛！

Textby　關仁