禮拜日(6月17日)係父親節，各大小商場都人頭湧湧，將軍澳新都城二期都唔例外，但係好奇怪，行街嘅巿民目光一致望住一個位，有乜嘢咁吸睛呢？原來係阿sir擒賊。

街坊楊先生嗰日下晝4點幾落新都城行個圈，見到1樓一間服裝店外面，有三個孔武有力嘅男人撳住另一個男人喺地下，周圍有好多商場保安員圍住唔畀人行埋去，好多人好奇圍觀，後來保安員索性用圍板圍封嗰個範圍唔畀睇。

楊先生於是向啲friendly啲嘅保安八下乜事啦，原來三個男人係阿sir嚟嘅，捉咗一個懷疑喺商場2樓一間百貨公司偷嘢嘅賊仔，店員發現有人偷嘢就大嗌偷嘢呀，仲衝出舖頭追賊，追到落1樓，至於嗰3位阿sir係咁啱喺現場，定係有人報警先到場捉賊，楊先生就話點八唔到嘞。

但佢補充，眼見個賊似係後生仔，戴眼鏡斯斯文文，3位阿sir hold住擒賊個動作成半個鐘有多，5點幾先有軍裝到場用手銬拉個犯返差館問話。

警方發言人表示，下午5時06分，千色店職員發現一名男子拿走一套約值400元的茶壺，但未有付款便離開，職員追出，男子逃走，其間有途人包括一名警員見狀追截，成功制服該名賊人，姓羅（27歲）本地男子涉嫌偷竊被捕帶署調查。　

你敢爆，我敢獎！ 即Call《蘋果》24小時爆相爆片熱線 ：63836568