呢晚（13日）快活谷最尾第八場二班一哩開大熱Win，苗禮德馬房「川河寶駒」夥拍年輕騎師史卓豐後上險勝，六歲馬錄得轉廐後首捷，單Win及組合獨贏A1分別派36.5及23.5元。苗禮德連同第五場由田泰安贏「招多福」，全晚出兩駒全勝冇嘥料，馬房今季開齋即起孖。

「川河寶駒」以往曾兩勝二班谷草一哩，但上季尾仍由方嘉柏轉至苗禮德馬房，轉倉後7月份在苗廐兩戰，均於田草落敗，今次新季度初出，亦是轉廐後首戰谷草，臨場被捧成最熱一駒，沿途留在內叠中間第六位競跑，直路移出外叠越衝越勁，最終趕過最先突圍的冷馬「經典帝國」勝出，險勝一頭位，從而打破轉廐齋缽。

至於史卓豐，繼剛周日（10日）贏「旌暉」捧走廣東讓賽盃後，這晚憑「川河寶駒」再添頭馬，個人累積兩連勝。

尾場大冧巴馬表現較佳，8號「川河寶駒」勝出，11號「經典帝國」第二，6號「嘉應之友」第三，10號「美麗鉅星」第四，四重彩派四萬一千幾。騎師王則由潘明輝以四冠共48分大勝而回。