今年係香港回歸20周年，各個界別都有活動慶祝。而喺97回歸前拍攝，由陳果導演嘅電影《香港製造》，趁住電影上映20周年，選擇喺7月1日再喺戲院放映。

今次同20年前版本唔同嘅係《香》片經過數碼修復，陳果今日接受電話訪問指電影可以再上映係機緣巧合，佢話：「咁巧合意大利烏甸尼電影節贊助我哋，兩年前《那夜凌晨，我坐上了旺角開往大埔的紅VAN 》烏甸尼上映咗，佢哋話反應幾好喎，所以今次幫我哋數碼修復，嗰度都幾十萬(元)。」

陳果指當年《香》片因為冇錢，所以用嘅菲林唔少係人用剩或者過期貨，出嚟嘅色調效果好參差，今次修復後，色調光暗都有改善：「今年烏甸尼電影節同香港國際電影節都播咗，反應都幾好。」陳果話《香》片應該係回歸前，唯一一部講97嘅香港電影，其他好多都輕描淡寫，相反《香》片感覺好有爆炸力：「今時今日再睇返，畀當年嘅影響仲有一股無形嘅power喺度。20年香港變化梗係有，冇就大劑。寫嘅時候諗住同社會同步，20年後睇返都諗『點解當年自己會咁拍嘅』，都幾欷歔。」