今日抵港嘅「魏瓔珞」吳謹言，原來行程非常緊密，喺來港之前，噚晚現身杭州黃龍體育中心，為大陸男歌手張杰獻出第一次、擔任演唱會嘉賓。

吳謹言喺出騷前已經喺微博開po，佢話：「作為後輩和老鄉，能夠受邀參與到杰哥的演唱會當中十分榮幸，歌曲聽了不下八百遍，詞曲早已爛熟於心，現場拿着紙條也是為了接詞走位，只是我的唱功不像我的眉毛那般出眾明天我就努力去唱，夠膽就來聽喔！」

噚晚吳謹言正式登台，據知兩人同為成都人，為咗今次嘅演出，吳謹言仲特登推其他job嚟做嘉賓，佢同張杰合唱《我們都一樣》，未知係咪要就男key，所以吳謹言把聲略見低沉，音準亦有待加強，不過台風OK，佢仲可以同張杰喺台上講笑。而張杰都好體貼吳謹言，頻頻叫佢唔好緊張。

事後，吳謹言喺微博開po，仲留言話：「演唱會初體驗，唱完了手心還在冒汗！感謝杰哥，今晚很開心！」

精選娛聞，喺晒《娛果》
http://fb.com/appledailyent