9歲嘅「小巨肺」譚芷昀之前到美國參加《全美一叮》，提到佢拖視障對手Christian Guardino出台，卻被網民誤解為「關家姐衝出台」尷尬事，Celine解釋：「因為Christian眼有問題，當遇到好黑嘅情況就睇唔到嘢，佢就叫我扶佢出台，於是乎我就就扶佢。」

譚順生就幫口答：「其實呢件事，身為父母嘅感受都好大，因為比賽完，返到屋企，Celine有同我哋講番呢件事，點樣帶呢位弱視嘅參賽者出場，好多評判都以為Celine係行錯路，其實係一個無私嘅大愛，好似歌曲一樣，連父母同評判都見唔到嘅嘢，Celine妹妹都自己做咗出嚟！我都讚佢so proud of you ！so great！」

問到之前係咪參加「全美一叮」，有保密協議，所以接少咗工作，譚順生話：「等經理人決定啦，暫時都未知道，等享受生活啦！暫時都未知稍後有冇幕前工作。」問有冇加騷錢？譚順生開頭避談，但記者連番追問，佢就話：「我哋講番今日嘅節目啦，(加價？)其實唔會理嘅，每個騷都會以經驗行先，好似今日咁，Celine好鍾意食嘢，所以咪出席囉！」