曾經數度易主，見證樓市起落巨變嘅香港置業，藉住今次樓市谷底反彈，想嚟一次大翻身，由約莫七百人嘅中型行，未來一年大舉增聘四百人，將公司越級提升至逾千人嘅大行之列，分行就由二十八間，三級跳至一百間。
港置董事胡日發話，邁向大行行列，係佢哋今年嘅目標，除咗繼續增加人手，鞏固一手市場業務，又會增加二手市場人手調配。
既然有晉身大行嘅氣魄，視為身份象徵嘅港置topsales組織置尊會，入會資格也大幅提高，主管級人馬，全年營業額，以往只係八百萬，今年定為一千萬，只限十人。前線員工營業額，就由以前一百二十萬，升至一百八十萬。
今年新一屆會長由新界區王品弟當選，兩個副會長就係九龍區嘅姚偉南，同埋港島區嘅翁祥生。胡日發同執行董事陳坤興，噚日重親自幫佢哋「加冕」，個場面就好似阿爸第一次幫個仔打煲呔一樣，都幾搞笑。

炒得興起炒上深圳
「只要有得炒嘅地方，就有香港人」，呢句一啲都無錯。
話說大家都預計到，香港同深圳融合，只係遲早嘅問題，近年深圳樓市又年年升，吸引到炒性難改嘅香港人北上炒樓。
近文錦渡口岸嘅朗鉅御風庭，聽中原中國金志剛講聽日賣，但已經收咗四百幾票，唔少重係嚟自香港嘅投資客，其中一個，入咗五十幾張，中籤機會率係八分一。
蘭西諗，呢位投資客咁積極，唔知會唔會買番十間八間呢？
如果上邊都興炒籌嘅話，佢又可以將用唔晒嘅quota，炒吓籌賺番筆。