【賢仔Call馬】富貴險中求！「金剛」博冷合時（廖浩賢）
蘋果日報 2019/12/03 22:20
廖浩賢神火金剛賢仔call馬
神火金剛上仗第四試準
周三（4日）晚上演國際騎師邀請賽，今屆有戴圖理、莫雅、蘇兆輝、莫艾誠等歐洲最頂尖高手在陣，再加埋本地代表雷神、潘頓、田泰安及何澤堯，相信有一番龍爭虎鬥。
鑑於有四場騎師賽，究竟步速、跑法上都難以估計，集中火力攻頭場五班賽事，冷敲「神火金剛」。
第一場五班1200米，識贏的馬寥寥可數，「幸運大兄」上季兩捷谷草短途，賽績稍為有根據，今季轉蘇保羅馬房，睇狀態開始入局，但要留意排九檔有機會被頂出三疊。
「餘皇」季初仍在四班上名，秤班底可以拖一注。「劍追聲」晨課表現充滿蠻力，是一匹有用而未識得放鬆競跑馬，抽二檔有遮檔會好跑。
大部份馬匹都各有弱點情況下，富貴險中求，博排12檔的「神火金剛」，原因好簡單，是場快馬多好有機會前段鬥搶，末段群駒力弱墮退，變相疊埋心水掟出外檔衝刺馬匹會有利。
本身曾在52分輸「帶運來」跑第三，如今評25分點計都有利，上仗慢步速，直路見李寶利移出中檔望空，先打左手鞭少少失平衡，修正後用右手打鞭反應出奇地好，提防今仗還盅。