馬會將AC米蘭「新保方」譯做基安盧基當拿隆馬相當繞口，不過呢位18歲門將喺日前確定拒絕同A米續約，被指貪錢要走人，即刻有個好易記嘅新外號：「Dollar隆馬」。Dollar喺周日代表意大利出戰U21歐國盃分組賽，波就贏咗以2:0輕取丹麥U21，但比賽期間就俾人侮辱，有球迷將假錢撒向Dollar把守嘅龍門度。咁貪錢，依家一地都係，去執喇！

當拿隆馬唔肯同AC米蘭續約，呢個決定就令到A米球迷好不滿。隆馬有份代表意大利U21出戰U21歐洲國家盃，周日意大利進行C組首場分組賽鬥丹麥，相信係對隆馬懷恨在心嘅球迷趁機做嘢，喺比賽進行到35分鐘，有人將一大堆假一蚊美金紙幣撒向龍門一帶，一地都係錢擺明係衝住隆馬而嚟，搞到球證要暫停比賽，搵球僮幫手執番啲假錢先至再繼續比賽。喺看台上面，亦有人拉起寫住「Dollarumma」嘅橫額，好地地新保方就變成Dollar隆馬咯。

Dollar變成過街老鼠，被指貪錢要走人，或者係受人唆擺所害。外界普遍認為罪魁禍首係佢背後嘅萬惡根源，「吸血鬼」經理人拉奧拿，亦是目前最高轉會費世界紀錄球員，曼聯保羅普巴的經理人。

拉奧拿原定喺周日招開記招詳細交待事件，之後變咗接受傳媒訪問，話佢哋先係受害者，因為隆馬同佢屋企人之前都受到恐嚇，先決定拒續約。