模特兒公司老闆娘李月(BoBo)同Mandy Lieu喺4年前合作搞模特兒公司Quest，噚日佢哋公司就喺北京以百萬投資開辦「北京星潮模特兒學校」，不過今次學校就冇Mandy份，BoBo係主要投資者，BoBo話：「我已經冇同Mandy聯絡，唔想打擾佢，佢已經冇理香港公司，不過仲有股份喺度，今次北京主要係我自己投資，但係會用返Quest呢個名。」

學校噚日開幕，BoBo嘅好友鍾浠文同倪晨曦都專誠飛去北京支持，佢哋仲一口答應幫學校做講師，分享做模特兒嘅點滴，BoBo話：「學校8000幾呎，我哋想培訓名模，培訓嘅包括化妝、跳舞、健身、營養都包含晒。我哋會同有潛質嘅模特兒簽約，仲會連接外國，send佢哋去歐美天橋。」BoBo目標明年喺杭州、上海同山東開分校，佢仲話希望可以搵多啲星級導師，BoBo話：「我會搵中間人聯絡劉雯，我好鍾意佢，佢性格隨意自然，希望可以請佢嚟到分享。」

更多娛聞，喺晒《娛果》
http://fb.com/appledailyent