成日有人話娛樂圈人情紙咁薄，相信杜琪峯﹑盧海鵬、羅冠蘭同吳孟達等電視台第三、四期訓練班藝人，就可以用行動打破呢種講法。

佢哋噚晚齊集觀塘杜琪峯公司，舉行「相識相遇四十載」，一班舊同學仲邀請訓練班恩師鍾景輝（KingSir）、劉兆銘、陳文輝等出席，場面熱鬧又溫馨﹗對於娛樂圈唔少巨星由佢哋教出嚟，KingSir同銘Sir謙虛話：「佢哋叻過我。」KingSir強調佢哋只係教基本嘢，之後嘅成功係由佢哋慢慢磨練出嚟。

今年適逢係第三期訓練班40周年，之前有人提議不如搞聚會慶祝，花咗幾個月終於夾到大家時間，杜Sir仲提議喺自己公司搞擺三圍，是次慶祝會以到會形式舉行，大家夾少少錢，杜Sir包底，同屬第三期訓練班嘅周潤發，就由杜Sir負責聯絡，發哥表示抽到時間會出席聚舊。

同一班舊同學見面，吳孟達話：「依家個個都靚仔過我，當年邊會靚仔得過我，真係歲月催人老，眨下眼就40年。」期間鵬哥突然出現，達哥就自爆第三期同學仔中最曳係自己，接住就係鵬哥，達哥話：「大家同期，佢成日整蠱陳有后，比支煙后叔，仲好自然幫佢點，因為佢食就唔會鬧我哋。」



本報娛樂版舉辦的「萬千星虧頒獎禮」已經來到第五屆，今屆口號為「全民起義，網民話事」，換言之由網民一人一票選出心目中最虧代表，包括男主角、女主角、最虧節目及最虧場面。讀者可由即日起至本月14日、晚上11時59分之前，到以下網址( http://campaign.appledaily.com/tvawards2013 )投票。投票結果於本月16日在本報娛樂版及網上公佈。