東亞銀行（023）緊貼FinTech趨勢，太子爺李民橋（Adrian）將觀塘東亞銀行中心26樓打造成創新中心（Innovation Centre），仲學足科網巨企一樣有「度橋房」，呢度稱為iHub，Adrian都會不時去呢個房，跟IT部門員工一齊腦震盪。
Adrian噚日帶傳媒參觀呢個有3,500方呎嘅創新中心，呢度其實係東亞其中一個寫字樓，屬自置物業，Adrian點設計都得。至於投資咗幾多錢，Adrian話唔係用錢衡量，但相信同幾年前銀行重新打造品牌一樣咁值得。
創新中心內三大區域全部用「i」字行頭，包括iCentre、iHub同iLab。iCentre將分行最新嘅智能科技設備大晒冷，並充當智能數碼分行嘅培訓中心。

三年內實踐無紙化交易

喺iCentre入面嘅iHub，有道「隱形門」幾過癮，想開門要用手機認證。聽講只有東亞IT部員工與部份高層先有認證，Adrian當然有份喇。
佢仲擺好甫士即場示範，拎出自己部太空灰嘅iPhone6s Plus向牆上嘅感應器嘟一嘟。當認證成功後，感應器屏幕立即顯示Adrian幅大頭相，iHub大門隨即自動打開，整個過程唔使一分鐘。
不過，iHub呢道科技之門噚日有少少甩轆，道門打開一半就停咗，需要重新做認證。
Adrian不時會去iHub開會，將idea寫低，成班同事諗到好橋，就會交由iLab同事研究。
Adrian搞呢個創新中心，無非想進一步實踐分行數碼化、無紙化交易。適逢2018年係東亞銀行一百周年，佢希望3年內全部分行落實無紙化交易咁話。

李華華
mailto:[email protected]